دانلود کتاب Empandiika y’Oluganda Entongole

Olulimi Oluganda lumaze emyaka egisukka mu asatu okuva mu 1966 nga terusomesebwa mu masomero ago asookerwako ge tuyita aga pulayimale. Kino kyajjawo olw’okubanga gavumenti ezizze zibaawo bukya enfuga eya fedulo eggibwawo oluvannyuma lw’enkyukakyuka ezajjawo mu 1967, ebbanga eryo lyonna essira libadde liteekebwa ku Lungereza okuviira ddala omwana lw’ayingira mu ssomero okutuusa lw’amalako pulayimale. Olwokubanga Oluganda lubadde terusomesebwa mu pulayimale ne mu matendekero g’abasomesa aga pulayimale nayo lubadde terukyaliyo. Kino kiviiriddeko abasomesa ba pulayimale abatendekeddwa okuva mu myaka gy’enkaaga obutamanya Luganda era n’empandiika yaalwo entongole. Bwe kityo n’abaana abayise mu masomero ago nga kati bantu bakulu nabo tebamanyi
mpandiika yaalwo okuggyako abatono ennyo abafunye omukisa okusoma mu sekendule Oluganda gye lusomesebwa era ne balusomako. Naye nno olwokubanga abaana babadde Oluganda balutandikira waggulu eyo ng’ate tebafuna biseera bimala nga balusoma mu kibiina, era tebalukaza yadde empandiika yaalwo. Eky’omukisa kati, Gavumenti yamala okuyisa ekirangiriro ng’ennimi ennansi bwe zijja okutandika okusomesebwa okutandika n’omwaka ogwa 2000 okuviira ddala wansi mu kibiina ekisooka era nga n’ebyokuyiga byonna bijja kusomesebwanga mu nnimi ezo okutuusa mu kibiina ekyokuna ekya pulayimale. N’olwensonga eyo ekitabo kino kye kivudde kiwandiikibwa olw’okuyamba abasomesa n’abayizi ab’amadaala gonna okuyiga empandiika y’Oluganda entuufu. Muteereddwamu n’ebyokukola bisobole okuyamba abayizi okwejjukanyanga. Abasomesa basabibwa obuteesiba nnyo ku bya kukola ebyo byokka ebiri mu kitabo kino, naye bafubenga okuwa abayizi eby’okukola ebirala bingi bisobole okuyamba abayizi okukaza empandiika eyo. Empandiika y’Oluganda bw’eriddibwamu okulongoosebwa era n’ekakasibwa ekitabo kino kiriddibwamu ne kitereezebwa okusinziira ku nkyukakyuka eziriba zizzeewo. Neebaza nnyo Mukyala wange Nightingale Erunensi Nampeera eyassa ekitabo kino ku kompyuta era n’akitegeka bw’ati.