دانلود کتاب Eeufees-gedenkboek van die Ned. Geref. Gemeente Oudtshoorn

VOORWOORD
Hierdie taak is oorspronklik opgedra aan Ds. P. J. Viljoen, oud-leraar van Oudtshoorn. Hy het besonder belang gestel in die geskiedenis van die dorp en die gemeente en het gedurende sy dienstyd alhier waardevolle inlighting ingewin waarvan hy gedeeltes in die vorm van artikels in die "Kango Kerkblad" gepubliseer het. Hy was dus die aangewese persoon om 'n geskiedenis van die gemeente van Oudtshoorn op te stel.

Ongelukkig is hy, weens die ongesteldheid van sy eggenote, verhinder om die opdrag uit te voer en is die taak uiteindelik, en feitlik ter elfder ure, aan die skrywer hiervan opgedra.

Vir laasgenoemde is dit 'n behoefte om sy dank en erkentlikheid te betuig teenoor Ds. Viljoen vir die waardevolle inligting wat hy versamel het en waarvan die opsteller ruim gebruik gemaak het. Sonder hierdie inligting sou sy taak feitlik onmoontlik gewees het.

Ook wil die skrywer sy opregte dank oorbring aan Mej. C. A. Elliott wat al die nommers van die "Kango Kerkblad" nog in haar besit het en wat hulle goedgunstiglik tot sy beskikking gestel het. Daardeur is sy taak aansienlik vergemaklik.

Dat hierdie werkie mank gaan aan baie gebreke en weens sy beknoptheid geensins kan aanspraak maak op volledigheid nie, erken die skrywer ruiterlik. Dit is egter die beste wat hy, met die tyd en die bronne tot sy beskikking, kon doen.

Ons dank ook aan die kerkraad vir die voorreg en die eer om hierdie werkie ten behoewe van ons Kerk te kon doen.

DIE SAMESTELLER