دانلود کتاب Ñukanchik kichwa shimita yachashun. Aprendamos nuestro idioma quichua (Qichwa/ Quechua)

Mashna watakunamanta kay Abya Yala, Ecuador mamallaktakunapi
kawsak mashikunaka yalli wakllirishka, ahashka, mutsurishka,
sarushka, “runakuna mana nimata yachak”, yallitak wakllirishka,
makashka, kawsak warmi, kari runakuna kashka; chaymanta,
kay llakikunata hapishpa, shinallatak ña ima pachakunamantami,
hatarikunchik, kaparikunchik, ñukanchik kawsay, yachaykunata
willakunchik, ñukanchik hatun, sumak yachaykunata ña, manapi
mishukuna wakllichinkachu nikunchik. Ashtawanka ñukanchikpak
yachaykuna, shinallatak ñukanchikpak kichwa shimika, Ecuador
mamallaktapak 2008 mamakamachiypi kayta nikun: “castellano
shimika Ecuador llaktapak kamachiy shimimi kan; castellano,
shuar, kichwa shimikunaka kawsaypurapak kimirichik kamachiy
shimikunami kan. Shuktak ñawpak shimikunaka, shimi kamaychipi
nishkashina”chaymantami kay llaktakunapika tawka mashi,
shimikuna, yachaykunapash tiyashkamantaka “multilingüe y
pluricultural”, shutikunawan riksinchik.
Chayta yuyashpami, chayta paktachinkapakmi kay Chimborazo
markamanta Sumak Hatun Yachana Wasipi (Universidad Nacional
de Chimborazo), kay kichwa shimita yachachik, yachakuk
mashikunaman yachachinata kallarishka, chaymantami kay kamuta
kikinman, yachakuk mashikunaman tukuy shunkuwan kikinpa
makipi churakunchik, kaywanmi “ishkay shimi, ishkay kawsay
runakuna” kashun.
Kallarimantaka kichwapa yachaykuna, uyaywa, uyantinmanta,
katishunmi kutin kari, warmiyachina, shutikuna, shutiparanti,
katinmi rikuchikkuna, imachikkuna, imallichik, shimikukuna,
tukurinkapakka kichwapi rimay, kichwapi arawikunatapash
rikushunmi.
Ñukanchikpak shimita yachashpa, ñukanchikpak shimipi
rimashpami sinchi runa, sinchi mashi, sumak warmipash kashum,
chaymantami kay kamupi tukuyta taripanki, kanpa shunkuwan,
kanpa yachaywan, yuyaywanpash shuktakkunaman karashun,
chaymantami ñukanchikpak mamallaktapash pluricultural,
multilingüe kawsaytapash hapishun.